Руската амбасада во Париз реагираше и ги осуди тврдењата на високи француски претставници за наводна вмешаност на Русија во движењата против вакцинацијата на социјалните мрежи.
„Со изненадување и огорченост ја примаме изјавата на поранешниот француски министер за внатрешни работи, а сега шеф на парламентарниот клуб на владејачката Република во движење (ЛРЕМ) Кристоф Кастане, дека Русија и другите земји може да стојат зад движењата против вакцинација на социјалните мрежи”, соопшти руската амбасада на Фејсбук, објaвија руските агенции.
Во соопштението на амбасадата, исто така, се нагласува дека принципиелната позиција на Русија е да обезбеди максимално снабденост на населението на планетата со вакцина против коронавирусот.
Во интервју за радиостаницата РМЦ, Кастане претходно одговори потврдно на прашањето дали Русија или другите земји можат да влијаат на движењата против вакцини на социјалните мрежи. Во услови на драматично зголемување на случаите со делта-вирус, француската влада подготви предлог-закон за проширување на употребата на здравствени сертификати и скали за имунизација, со кој се предвидува задолжително вакцинирање на вработените во медицински установи, домови за стари лица, противпожарни и спасувачки служби и бројни категории во војската, ова, пак, од друга страна предизвика незадоволство во земјата, која ја тресеа протести во последните две недели.
Претходно, францускиот претседател Емануел Макрон изјави дека само 60 проценти од Французите примиле барем една доза од вакцината за коронавирус.
