Украина има потенцијал да и нанесе големи загуби на Русија и да напредува на бојното поле, тврди украинскиот претседател Володимир Зеленски.
Говорејќи во видео обраќање доцна синоќа по состанокот со високи воени команданти, тој изјавил дека интензитетот на нападите против Русите мора да се засили.
„Разговаравме за моменталната ситуација на линијата на фронтот околу Украина. Имаме дефинирано задачи во некои тактички области за да ги зајакнеме нашите позиции. Исто така, темелно го разработивме прашањето за снабдување на војниците со модерно оружје – интензитетот на нападот на непријателот допрва треба да се зголемува“, посочи тој.
Изјавил дека учесниците на состанокот се согласиле дека Украина има потенцијал да напредува на фронтот и да им нанесе нови значителни загуби на окупаторите.
Киев се надева дека западното оружје, особено ракетите со долг дострел, ќе и овозможат на Украина да започне контранапад и да ја врати територијата.
„Секој од руските напади е аргумент за Украина да добие повеќе модерно и ефективно оружје. Секој од овие напади само ја зајакнува нашата желба да ги победиме напаѓачите и тоа сигурно ќе се случи“, рекол Зеленски.