Ѕвоната на Националната катедрала во Вашингтон во понеделникот заѕвонија 1.000 пати во чест на жртвите од Ковид-19, додека Соединетите држави се на пат да ја надминат бројката од еден милион загинати.
Соединетите држави официјално објавија најголем број на смртни случаи во светот, повеќе од Бразил, Индија и Русија, а во понеделникот имаа повеќе од 995.000 смртни случаи од Ковид-19, според најновите податоци на Универзитетот Џон Хопкинс.
Големото ѕвоно на катедралата заѕвони во 18:00 часот (полноќ по средноевропско време), кое се емитуваше во живо на YouTube, а секој звук на ѕвоното претставуваше 1.000 луѓе кои починаа во пандемијата.
„Денес нашата земја помина трагична фаза – еден милион Американци починаа од Ковид-19“, рече ректорот на катедралата, свештеникот Рандолф Маршал Холерит, пред да заѕвонат камбаните.
Дневниот број на заразени се зголемува во последниве недели во САД, по укинувањето на задолжителното носење маска за лице, што сега се препорачува само во затворени простории за повеќето жители.
Според неодамнешните проценки на Светската здравствена организација (СЗО) од 1 јануари 2020 година до 31 декември 2021 година, пандемијата убила меѓу 13 и 17 милиони луѓе ширум светот.
