По повод 4 април, денот кога беше формирано НАТО, генералниот директор на Роскосмос, Дмитриј Рогозин оцени дека Алијансата е главната закана за светот и ги повика нејзините членки да запомнат дека Русија ги набљудува од вселената.
„Би сакал моите стари познаници од работата во Брисел, особено генералниот секретар на НАТО, Јенс Столтенберг, да се восхитуваат од нивната канцеларија на роденденот на НАТО користејќи ја сателитска снимка од вселенското летало Роскосмос. Момци, ве гледаме. Имајте го тоа на ум“, напиша Рогозин на Телеграм.
Заедно со објавата, тој сподели и сателитска снимка од седиштето на Алијансата во Брисел, која ја направи рускиот сателит Resource-P.
Рогозин потсети дека на 4 април 1949 година претставниците на 12 земји – Белгија, Велика Британија, Данска, Исланд, Италија, Канада, Луксембург, Холандија, Норвешка, Португалија, САД и Франција го потпишаа Северноатлантскиот договор.
„Така се роди НАТО – главната закана за целиот свет кој ја преживеа Втората светска војна“, изјави Рогозин.
