Според Светската здравствена организација, постојаното пренесување на мајмунски сипаници од човек на човек во Европа е елиминирано.
Регионалниот директор на СЗО за Европа, Ханс Клуге вели дека има охрабрувачки рани знаци дека епидемијата на мајмунски сипаници забавува.
Според последните информации, повеќе од 22.000 случаи се регистрирани во 43 земји во европскиот регион, што претставува повеќе од една третина од глобалниот број на инфекции. Ова ги вклучува Русија и земјите од Централна Азија.
Минатата недела, СЗО објави пад од 21 отсто на бројот на нови случаи во светот по четири последователни недели зголемување.
„Постојат охрабрувачки рани знаци, како што се гледа од Франција, Германија, Португалија, Шпанија, Обединетото Кралство и други земји, дека епидемијата може да забави. За да се придвижиме кон елиминирање на вирусот во Европа, мора итно да ги засилиме нашите напори. Сепак, веруваме дека можеме да го елиминираме трајното пренесување на мајмунски сипаници од човек на човек во Европа, доколку се посветиме на тоа и ги вложиме потребните ресурси“, рече Клуге.
СЗО препорачува одржување на мерките за надзор, насочена вакцинација и идентификација на случаи на контакт. Тие, исто така, препорачуваат да се работи со машката хомосексуална заедница, меѓу која главно циркулира вирусот, за да се поттикне средина без стигма и дискриминација.
