Опасен топлотен бран го зафати југозападниот дел на САД, кој се очекува да донесе екстремно високи температури во областа.
Синоптичарите најавуваат дека живата во термометрите би можела да достигне и до 44 степени Целзиусови во густо населените предградија на Лос Анџелес, а топлотниот бран ќе ги зафати и Калифорнија, Невада и Аризона.
Метеоролози: Опасно топли услови во текот на неделата
„Опасно топли услови се очекуваат во текот на целата недела“, предупреди Националната метеоролошка служба.
„Продолжениот период на прекумерна топлина значително ќе го зголеми потенцијалот за појава и развој на болести поврзани со топлината, особено за луѓето кои работат или учествуваат во активности на отворено“, предупреди NWS.
„Топлината ќе претставува најголем ризик за оние кои немаат пристап до соодветно ладење и внес на течности, но голем дел од остатокот од населението исто така може лошо да реагира на високите температури“.
Ноќните температури не се очекува да донесат големо олеснување, бидејќи во многу области најниските вредности ќе бидат околу 26,5 Целзиусови степени.
Топлината веќе се почувствува во и околу Лос Анџелес во вторникот, но Дејвид Свит, метеоролог на NWS во Окснард, Калифорнија, вели дека ќе се влоши.
„Очекуваме топлотен бран кој ќе започне во среда и ќе трае најмалку до понеделник следната недела“, изјави тој за АФП.
Температурите над 44 степени се сметаат за високи за Калифорнија
Топлотните бранови не се невообичаени за регионот на Јужна Калифорнија дури и во септември, но температурите над 44 Целзиусови степени се сметаат за невообичаено високи дури и за вечно сончевата Калифорнија.
Топлотниот бран ќе следи по бурните врнежи кои во последните неколку недели ги зафатија југозападните делови.
Сè поинтензивни и подолги топлотни бранови
Научниците се согласуваат дека глобалното затоплување, предизвикано главно од бескрајниот „апетит“ на човештвото за енергија од фосилни горива, ги прави природните временски варијации уште поекстремни.
Топлотните бранови стануваат поинтензивни, подолги и се карактеризираат со повисоки температури, додека бурите се карактеризираат со зголемено количество врнежи и во многу случаи се сè поопасни.
