Најмалку 13 лица загинаа, а повеќе од 50 се повредени кога рано утринава патнички воз делумно излета од шините во источен Иран, соопштија властите.
Се стравува дека бројот на жртвите би можел да биде поголем, иако не се разјаснети сите околности за несреќата и не се знае точно колку патници имало во возот.
Четири од седумте вагони излетале од шините пред зори недалеку од пустинскиот град Табас, на околу 550 километри југоисточно од Техеран, објави иранската државна телевизија.
Спасувачките тимови и хеликоптери се на лице место во оддалечена област каде комуникацискиот систем е лош. Најмалку 16 луѓе претрпеле сериозни повреди опасни по живот, а некои се префрлени во локалните болници.
Излетувањето од шините се случило на околу 50 километри надвор од Табас, на пругата кон градот Јазд.
Според првите информации, патничкиот воз се судрил со багер во близина на пругата, иако не е јасно зошто багерот во тој момент бил блиску до пругата.
Иран има околу 14.000 километри железнички линии низ целата земја, што е околу два и пол пати поголема од Тексас.
Околу 17.000 луѓе годишно гинат во сообраќајни несреќи во Иран, што е еден од најлошите рекорди за безбедност во сообраќајот во светот. Главните причини се широко распространето непочитување на сообраќајните прописи, неодржувани возила и несоодветни служби за итни случаи.
