Италија откри детали за новата шема на „бонуси за одмор“ според која секое домаќинство со ниски приходи ќе добие до 500 евра, за да помогне во закрепнувањето на секторот за туризам.
Владата соопшти дека издвојува 2,4 милијарди евра за домаќинствата кои заработуваат помалку од 40.000 евра годишно, со цел да добијат финансиски стимул за одмор во Италија, а не во странство.
Даночната администрација објави дека бонусите ќе бидат 150 евра за самци, 300 евра за двојки и 500 евра за семејства со три или повеќе членови.
Бонусот може да се искористи за плаќање на сместување за одмор во Италија помеѓу 1 јули и 31 декември оваа година.
Можно е да се добие попуст од 80 проценти на цената на хотелската соба, ноќевање со појадок или апартман со исхрана во сопствен аранжман, а може да се побара и друго ослободување од данок.
Туризмот учествува со околу 13 проценти од бруто-домашниот производ на Италија и е тешко погоден од пандемијата на коронавирус, при што експертите прогнозираат намалување на приходи од дури 3,2 милијарди евра ова лето во однос на минатата година.
Италија ги отвори своите граници за туристите од ЕУ и земјите од шенген на 3 јуни.
