Вчера, во германскиот град Улм, 40-годишен маж со нож ја убил 7-годишната ќерка на својата партнерка. Тамошната полиција соопшти дека самиот маж се јавил во полиција во понеделникот на Велигден и рекол дека го убил девојчето во теренот на училишниот центар во областа Виблинген.
Полицијата веднаш излегла на местото на злосторството и таму затекнала 40-годишен маж.
Полицајците го привеле мажот во полициска станица, а вештаците во вечерните часови го затвориле местото на злосторството.
Германските медиуми пишуваат дека сè уште е нејасна заднината на злосторството, а полицијата сè уште истражува. Според полицијата, според моментната состојба на истрагата, се работи за „чин внатре во семејството“ и немало никаква опасност за околното население.
Најпрвин медиумите објавија дека убиецот е таткото на девојчето, но портпаролот на полицијата утринава за германски РТЛ изјави дека тој ѝ е партнер на мајка ѝ.