Руската влада, најверојатно, ќе воведе сè построги ограничувања за патување на руските службеници, објави британското Министерство за одбрана во својот извештај за ситуацијата во Украина. Постои реална можност „да се заострат патните ограничувања за зголемен број вработени во јавниот сектор“, најавуваат оттаму.
„Мерките, најверојатно, се дизајнирани да го спречат бегството или пребегнувањето на сè понезадоволни службеници“, се додава. Ограничувањата за патување за владините службеници, пишуваат аналитичарите, веќе беа во сила за време на советската ера и беа заострени по анексијата на украинскиот полуостров Крим во 2014 година.
Мерките беа продолжени по руската инвазија на Украина во февруари 2022 година. „Некои функционери можеби мораа да ѝ ги предадат своите пасоши на Федералната служба за безбедност“, се вели во извештајот. На оние во внатрешниот круг на Кремљ им е „забрането секое меѓународно слободно патување“.
