Европа се соочи со можност од радијациона катастрофа во четвртокот кога нуклеарната централа окупирана од Русија беше исклучена од електричната мрежа на Украина, изјави претседателот Володимир Зеленски.
Тој додаде дека електраната во Запорожје може да работи безбедно само поради резервите на енергија. Пожарите претходно ги оштетија надземните далноводи и ја прекинаа работата на централата, јавува Би-Би-Си.
Постои зголемена загриженост поради борбите што се водат во близина на комплексот, кој е најголемата нуклеарна централа во Европа.
Штетата е предизвикана од пожари за кои државната нуклеарна агенција на Украина соопшти дека ги прекинале далноводите што ја поврзуваат централата во четвртокот, исклучувајќи ја централата Запорожје од националната електрична мрежа за прв пат во историјата.
Државната нуклеарна компанија во петокот попладне објави дека централата е повторно приклучена на електричната мрежа, а еден од нејзините шест реактори обезбедува електрична енергија.
Сателитските снимки направени во средата покажуваат голем пожар кој гори во непосредна близина на нуклеарниот комплекс.
Претседателот Зеленски го обвини руското гранатирање за штетата, а во своето ноќно обраќање ја обвини Москва дека поради тоа Украина и Европа се „на чекор“ од катастрофа,пренесуваат медиумите.
