Неидентификувано лице се обидело да го прободе американскиот конгресмен Ли Зелдин со остар предмет додека тој држел говор во својата кампања за гувернер на Њујорк.
Како што соопшти изборниот тим на Зелдин, тој не е повреден.
На видео снимката објавена од сведоци на социјалните мрежи се гледа како неидентификувано лице со црна бејзбол капа се приближува до Зелдин на бината за време на вчерашниот предизборен митинг во американската сојузна држава Њујорк, држејќи оружје во рацете, наведува британска агенција.
На видеото се слуша како мажот му повторува „заврши“ на Зелдин додека посегнува по лицето и вратот на републиканскиот кандидат.
Конгресменот го оттурнал пред двајцата да паднат на земја, додека неколку други присутни се обиделе да го совладаат осомничениот. Портпаролката на изборниот тим на Зелдин на Твитер објави дека осомничениот се обидел да го избоде конгресменот, а тој и неговите соработници се неповредени.
Таа исто така рече дека Зелдин го завршил својот говор по инцидентот и им се заблагодарил на полицајците кои реагирале за време на нападот.
Локалната полиција не даде официјално соопштение во врска со овој инцидент, наведува британската агенција.
