Зоран Заев и Садула Дураки им порачаа на македонските граѓани дека ќе продолжат да се трујат од загадениот воздух бидејќи Македонија не била Швајцарија. Понижувачко оправдување на неспособна и криминогена власт, обвинија од ВМРО-ДПМНЕ.
„Знаат граѓаните дека Македонија не е Швајцарија бидејќи во Швајцарија не се делат милиони на лубриканти додека 460.000 луѓе се под прагот на сиромаштија и имаат проблем да си купат леб. Знаат граѓаните дека Македонија не е Швајцарија бидејќи претседателот на владата таму не барал по едно евро од квадрат за црквата и евро за неговиот брат. Знаат граѓаните дека Македонија не е Швајцарија бидејќи таму нема криминални тендери, нема субвенции за иновации за снаи на советнички, ниту концесии со марихуана за премиерот. Швајцарија не го продава името, како што вицепремиер во Македонија си ја продава фирмата на грчкото електростопанство“, велат од ВМРО-ДПМНЕ.
На Шилегов, додаваат од партијата, полна му беше устата со ветувања за почисто Скопје, а една година со прст не мрдна да преземе соодветни мерки против загадувањето на Скопје.
„Како последица на рекордното загадување во Скопје и во другите градови во пораст е бројот на лица со малигни заболувања. Во пораст се и другите заболувања кои се резултат на негрижата на локалните власти. Додека карциномот тивко ги убива граѓаните, Шилегов и СДСМ немаат никаков план и не преземаат никакви мерки за загадувањето. Тие се одговорни што свесно ги оставаат граѓаните секојдневно да се гушат. Ветувањето на СДСМ за чист воздух е голема измама, се губат човечки животи а владата не превзема ништо. Граѓаните секој ден слушаат само бајати теми, а владата на СДСМ не презема конкретни мерки за подобрување на квалитетот на воздухот. Зоран Заев, Садула Дураку и Петре Шилегов или да ги засукаат ракавите или да си заминат и целосно да се посветат на криминал, а да остават некој сериозно да преземе мерки за подобрување на животот на граѓаните. СДСМ директно е виновен затоа што секој ден се губат човечки животи поради енормното загадување“, велат од ВМРО-ДПМНЕ.
