Владата на седница донесе одлука за воведување нова дополнителна субвенција од 1 денар за килограм предадено грозје за сортите „смедеревка“ и „вранец“. Корисници на оваа нова подмерка што се воведува во Програмата за финансиска поддршка во земјоделството за 2018 година се земјоделските стопанства што имаат површини под лозови насади и оствареното производство од сортите „вранец“ и „смедеревка“ од реколта 2018 и го предаваат во регистрирани капацитети за производство на вино во Република Македонија. Лозарите за оваа нова дополнителна субвенција ќе може да конкурираат до 25. 12. 2018 година.
Во барањето за аплицирање треба да приложат и доказ потврда дека грозјето е предадено во домашни винарници. „Со воведувањето на оваа нова дополнителна субвенција ќе се придонесе за зголемување на рентабилноста на производството на овие две најзастапени сорти. Дополнително, со годинешната Програма за финансиска поддршка во земјоделството, лозарите што имаат од 1 до 10 хектари лозје, ќе добијат, наместо 40.000 денари, 48.000 денари за хектар за одржување насади. Претворена во килограми оваа субвенција изнесува половина денар за килограм, што значи дека вкупната финансиска поддршка заедно со дополнителната субвенција ќе изнесува 1,5 денар за килограм“, соопшти Министерството за земјоделство.
Според најавите од страна на откупувачите на винско грозје, за претстојната реколта 2018 година се предвидува откуп од 38 милиони килограми од сортатата „смедеревка“ и речиси 42 милиона килограми за сортата „вранец“.
