Советникот за национална безбедност на Белата куќа, Џејк Саливан, денеска предупреди на зголемениот ризик од ескалација на конфликтот меѓу Израел и Хамас, притоа изразувајќи загриженост за можното вклучување на Иран во овој конфликт.
Саливан истакна дека американскиот претседател Џо Бајден (Џозеф Бајден) реагирал брзо и решително со цел да се спречи понатамошна ескалација.
– Постои ризик од ескалација на овој конфликт, отворање на втор фронт на север, и вмешаност на Иран – изјави Саливан во интервју за Си-Би-Си.
Саливан нагласи дека американската влада презела итни чекори за зајакнување на своето присуство во регионот.
Ова вклучува преместување на американски носач на авиони во источниот дел на Средоземното Море и префрлање на авиони во Персискиот Залив.
Овие потези, според Саливан, имаат за цел да испратат „многу јасна порака за одвраќање“ до секоја држава или актер што би можел да ја искористи моменталната ситуација.
Саливан исто така додаде дека САД не можат да ја исклучат можноста Иран директно да учествува во конфликтот.
– Мораме да бидеме подготвени за сите можни непредвидени ситуации – нагласи Саливан.
Последните случувања го вклучуваат пристигнувањето на првата ударна група носач на авиони USS Gerald R. Ford во близина на брегот на Израел претходно оваа недела.
Сега ударната група предводена од носачот на авиони „USS Dwight D. Eisenhower“ тргна од базата Норфолк во американската држава Вирџинија кон источниот Медитеран, јавува CNN.
Администрацијата на Бајден се обидува да ја врати рамнотежата и да ги смири тензиите во регионот за да обезбеди стабилност и безбедност, а истовремено предупредува на сериозните последици од можна ескалација на конфликтот меѓу Израел и Хамас.
