Пожарот во Еврос во североисточна Грција гори веќе 14-ти ден, а пожарникарите се борат да го запрат огнот и да спречат да се прошири кон Суфли и Протоклис.
Во гаснењето на пожарот се вклучени 582 пожарникари со 129 возила и 16 единици без возила, како и шест авиони и два хеликоптера, јави порталот „Катимерини“.
Вкупно во регионот изгореа повеќе од 808,7 квадратни километри.
Во четвртокот избувнаа 32 нови шумски пожари, а противпожарните единици изгаснаа 68 пожари во Еврос.
На Парнита, планина северно од Атина, пожарникарите гаснат пожар на југозападната страна.
Ризикот од пожари останува висок во многу делови на Грција и денес, а членовите на противпожарната служба и понатаму се во општа готовност.
Двајца високи претставници на противпожарната служба за „Катимерини“ изјавија дека нема оперативни слабости во гаснењето на пожарот во Еврос, кој трае веќе 14 дена, и оценија дека пожарот не може веднаш да се прекине.
Наведоа дека приоритет се безбедноста на луѓето и инфраструктурата и посочија дека за ширење на пожарот придонеле ветровите и сувото земјиште.
Но, граѓаните и претставниците на локалната самоуправа укажуваат на проблеми во координацијата кога на едно место дејствуваат пожарникари од други места, кои не ги знаат морфологијата и спецификите на загрозеното подрачје.