Centar.mk – Вести, бизнис, забава, спорт…
Војна во УкраинаСветТОП ВЕСТИ

Резников: Украинските војници ќе тренираат на тенкови „Леопард 2“

Украинскиот министер за одбрана, Алексеј Резников изјави дека украинските сили ќе бидат обучени да користат борбени тенкови „Леопард 2“, и покрај тоа што западните сојузници вчера не одлучија дали да го снабдуваат Киев со тенкови од германско производство.

Резников изјави за Гласот на Америка на Украина дека украинските војници ќе тренираат на тенкови во Полска, и го опиша развојот како пробив.

„Земјите кои веќе имаат тенкови `Леопард` можат да започнат програма за обука за нашите тенковски единици. Се надевам дека Германија ќе го следи нивниот процес, ќе спроведе внатрешни консултации и ќе донесе одлука за испорака на тенковите. Јас сум оптимист за тоа бидејќи првиот чекор е направен. Ќе започнеме со програми на `Леопарди 2“ – рече Резников.

Американскиот секретар за одбрана, Лојд Остин и началникот на Генералштабот на американската армија, Марк Мили за време на брифингот во американската воздухопловна база Рамштајн во Германија изјавија дека Германија во овој момент нема да испорача тенкови „Леопард 2“ на Украина.

На состанокот во Рамштајн, украинскиот претседател Володимир Зеленски упати директно барање тие тенкови да се испратат во Украина.

Резников рече дека е задоволен од резултатите.

„Верувам дека клучните концепти на состанокот беа единство, рокови за испорака на помош и зајакнување на способноста на вооружените сили на Украина да продолжат со контраофанзивните операции со цел привремено ослободување на окупираните територии на Украина“, рече Резников.

Тој изјави дека се потврдени сите претходно најавени пакети за воена помош.

„Покрај тоа, зад затворени врати се разговараше за некои нови пакети, но засега не можам да ги објавам“, додаде украинскиот министер.