Владата на Косово соопшти дека на средбата на премиерот на Косово, Албин Курти, со претставникот на ЕУ за дијалог, Мирослав Лајчак и со американскиот претставник за Западен Балкан, Габриел Ескобар, едногласно било договорено отстранување на барикадите во северот, пренесува Репортерс. Никој од Белград или северот на Косово засега не зборувал за ова.
– Разговараа за процесот на дијалог меѓу Косово и Србија и следните чекори, најновите случувања и актуелни прашања. На средбата е постигнат взаемен договор дека барикадите на северот кои ја попречуваат слободата на движење треба да се отстранат – се вели во соопштението на владата на таа земја.
Тој додава дека Курти рекол дека Косово е конструктивна страна во дијалогот со Србија.
– Преку подготвеноста за средби и разговори, Република Косово континуирано се покажува како конструктивна страна посветена на постигнување правно и меѓународно обврзувачки договор за целосна нормализација на меѓусебните односи со Србија со взаемно признавање во центарот – рече Курти.
Инаку, денеска ќе се сретнат Мирослав Лајчак, Александар Вучиќ и Габриел Ескобар.
