Украинскиот претседател Володимир Зеленски го обвини Иран дека зема „крвави пари“ од Русија за беспилотни летала камикази.
Овие беспилотни летала ги користат руските сили во смртоносни напади врз украинските градови, вклучувајќи го и Киев.
Руската употреба на беспилотни летала во војната против Украина се интензивираше од летото, кога Москва, според тврдењата на САД и Киев, набавила беспилотни летала Шахед-136 од Иран. И покрај доказите, Техеран негира дека и продавал дронови на Русија.
– Не му верувам на раководството на Иран. Сето тоа јавно го демантираат, велат дека не и продале ништо на Русија. Но, овде гледаме стотици напади со беспилотни летала. Во Украина, во Киев гледаме напади врз цивилната инфраструктура, врз училиштата, врз универзитетите. Тие ни го уништуваат енергетскиот систем – рече Зеленски во интервју за канадската телевизија CTV.
Си-Ен-Ен неодамна објави, повикувајќи се на извори во разузнавачката заедница, дека Иран испраќа воен персонал на Крим за да ја обучи руската војска за употреба на беспилотни летала.
Портпаролот на иранската мисија во ОН рече: „Иран го отфрла тврдењето“.
Зеленски вели дека не му верува на Техеран.
– Иран им ги испраќа тие дронови на Русите. Тоа им дозволува да убиваат Украинци. Се договорија, се работи за пари. За крвавите пари што ги заработува Иран – рече тој.
