Борис Крмов, пратеникот на Левица на својот твитер профил сподели цитат од „Кориоланус“ трагедија на Вилијам Шекспир, во која има повик на војна.
„Нека има војна велам јас: Го засенува мирот како денот ноќта: Таа е бласкаво будна, звучна и полна изблици. Мирот е мртвило летаргија;замаен, глув, сонлив, нечувствителен“ – пишува на твитер профилот на пратеникот Крмов.
По руското признавање на независноста на Донецк и Луганск, серија реакции со осуда на Русија, беа споделени на социјалната мрежа Твитер. За разлика од твитер статусот, на претникот на Левица, државно политичкиот врв во нашата земја, како и опозициската партија ВМРО ДПМНЕ, изразија јасна поддршка за територијалниот интегритет на Украина.
„Ја осудувам одлуката на Русија за признавање на Донецк и Луганск како самонаречени ‘Народни Републики’. Ваквиот чин е директен напад врз територијалниот суверенитет и интегритет на Украина и кршење на договорите од Минск и одлуките на Советот на ООН од 2015. Заедно со НАТО сојузниците повикуваме на решавање на конфликтот по дипломатски пат“ – напиша на Твитер премиерот Димитар Ковачевски.
„Силно го осудуваме признавањето од страна на Русија на украинските области Донецк и Луганск како независни. Ваквите акти претставуваат сериозно кршење на меѓународното право“ – напиша на Твитер шефот на дипломатијата, Бујар Османи.
Пратеникот на ВМРО ДПМНЕ, Антонио Милошоски на Твитер, напиша:„Македонија безрезервно го поддржува територијалниот интегритет на Украина и ја споделува позицијата на ЕУ заснована врз меѓународното право. „Наместо ескалација на конфликтот неопходни се дипломатски напори за преговори врз основа на обврските од Договорот од Минск“, додаде пратеникот.