Во Северна Ирска се пријавени пет сомнителни случаи на згрутчување на крвта поврзани со вакцината на „Астра зенека“. До 28 април оваа вакцина ја примиле 550.000 луѓе во Северна Ирска.
Бројот на пријавени несакани реакции е пропорционален на другите сомнителни случаи од цела Велика Британија, вклучително и Англија (198), Шкотска (18), Велс (9) и дополнителни 12 случаи за кои не е позната локацијата, пишува Би-би-си.
Во изјавата британското Министерство за здравство рече дека вакцината на „Астра зенека“ веќе спасила илјадници животи во Велика Британија и во целиот свет.
„Несаканите ефекти по првата доза на вакцината на ‘Оксфорд-Астра зенека’ се исклучително ретки“, објавија тие.
„МХРА (Агенција за регулирање на лековите) нагласува дека за огромното мнозинство луѓе придобивките од спречување сериозни болести и смрт се многу поголеми од какви било ризици“, наведува Министерството.
На владината веб-страница се наведува дека пријавените настани не се секогаш докажани несакани ефекти бидејќи некои настани може да се случат без оглед на вакцинацијата.
Заклучно со 28 април во Велика Британија се пријавени 54.139 потенцијални несакани ефекти од вакцината на „Фајзер/Бионтек“, 160.543 на „Астра зенека“, 683 на „Модерна“ и 574 каде што не е наведен типот на вакцина.
Апсолутниот ризик од згрутчување по примањето на вакцината на „Астра зенека“ е околу еден на милион.
„Фактот што сега излеговме од блокада во голема мера се должи на достапноста на вакцините на ‘Астра зенека’ и ‘Фајзер’“, тврдат од британското Министерство за здравство.
Најновите податоци од Велика Британија откриваат дека е забележан поголем број сомнителна тромбоза кај возрасната група од 50 до 59 години (68). Пријавени се 38 случаи во групата од 40 до 49 и 31 година за оние на возраст помеѓу 30 и 39 години.
Статистичките податоци откриле дека жените биле повеќе погодени отколку мажите.
Сите вакцини и лекови имаат некои несакани ефекти, а според регулаторот на МХРА, овие несакани ефекти треба да се балансираат со очекуваните придобивки во превенцијата на коронавирусот.
