Конзервативната и демохристијанска европска политичка партија, Европската народна партија (EПП), на официјалната интернет-страница ја напиша опозициската ВМРО-ДПМНЕ како партија од Република Северна Македонија. Ова значи дека најголемата политичка групација во Европскиот парламент официјално ги прифати преспанскиот договор и новото име на државата.
Oфицијалниот став на партијата ВМРО-ДПМНЕ е дека договорот од Преспа, со кој беше постигната промена на името на државата за севкупна употреба, е капитулација за државата. Членка на ЕПП е и грчката партија Нова демократија, која беше против преспанскиот договор да помине во парламентот во Атина. Европската народна партија е формирана во 1976 година од главно демохристијански партии. EПП е најголема партија во Европскиот парламент од 1999 година и во Европскиот совет од 2002 година.
(Makfax)
