Бројот на самоубиства меѓу американските работници е значително зголемен, а најголема стапка на самоубиства има кај мажите во градежната и рударската индустрија, односно кај жените што работат во секторот забава и медиуми, покажуваат резултатите од истражувања спроведени од страна на американските власти.
Од 2000 до 2016 година, стапката на самоубиства меѓу Американците на возраст од 16 до 64 години се зголемила 34 отсто, од 12,9 смртни случаи на 100.000 луѓе на 17,3, според студијата на Центарот за контрола и превенција на болести.
Највисока стапка на самоубиства кај мажите е забележана во секторите градежништвото и рударството, од 43,6 смртни случаи на 100.000 работници во 2012 година на 53,2 смртни случаи во 2015 година, се вели во анализата. Највисока стапка на самоубиства меѓу жените има во секторот забава, медиуми, дизајн и уметност, од 11,7 смртни случаи на 100.000 вработени во 2012 година на 15,6 смртни случаи во 2015.
„Со оглед дека повеќето од возрасните минуваат многу време на работа, работното место е важен дел на кој може да се влијае на превенцијата од самоубиства“, вели коавторката на студијата, Дебра Стоун, за Си-ди-си во Атланта.
Научниците истакнуваат дека недостигот на контрола во работењето и недостигот од чувство на сигурност на работното место може да бидат фактори што ги зголемуваат изгледите за самоубиство.
Исто така, многу фактори надвор од работното место може да влијаат врз ризикот од самоубиство вклучувајќи ги односите со партнерот, употребата на дрога, физичкото и менталното здравје, како и финансиските проблеми.
