Во пресрет на референдумот, кој треба да се одржи на 30 септември, неделава се очекува во земјава да пристигнат канцеларите на Германија и на Австрија, Ангела Меркел и Себастијан Курц, како и генералниот секретар на НАТО, Јенс Столтенберг, како и што уште во август објави Centar.mk, во Македонија се очекуваат најмоќните државници во Светот.
Столтенберг во земјава треба да допатува в среда, што е втора негова посета за последниве шест месеци. Германскиот канцелар, Себастијан Курц, ќе ја посети Македонија в петок, а средбите ќе се заокружат со посетата на Меркел, која се очекува да пристигне в сабота, кога се прославува Денот на независноста.
Премиерот Зоран Заев синоќа на трибина во Берово ги најави посетите, истакнувајќи дека доаѓањето на тројцата светски државници е уште еден позитивен сигнал, признание и поддршка за Македонија.
„Тие ни подаваат рака да одиме напред“, изјави Заев изразувајќи увереност дека референдумот ќе успее.
Според Заев, и опозицијата е свесна дека ова е моментот за ЕУ и НАТО, моментот кога сите треба да бидеме заедно и да се обединиме за европска Македонија. Заев истакна дека е убеден дека македонските граѓани ќе ја препознаат и нема да ја пропуштат историската шанса што ќе ја обезбеди иднината на државата и на следните генерации.