СДСМ е болест за македонското здравство. Секогаш кога СДСМ е на власт приоритет се интересите на нивните тајкуни, а не здравјето на граѓаните, стои во реакцијата на опозициската ВМРО-ДПМНЕ во однос на прес-конференцијата на министерот за здравство, Венко Филипче.
Оттаму сметаат дека здравствените услуги стануваат се полоши, а, како што велат, неспособноста на СДСМ, граѓаните ја плаќаат со сопственото здравје и сопствените животи.
„СДСМ ги компликува услугите што ќе ги добиваат пациентите, но затоа обезбедува екстра профит за бизнисмените блиски до партијата. СДСМ го укина советот за јавни набавки и повторно тргна по парите од здравството. По реакциите на граѓаните, ЌЕ Министерот Филипче денес мораше да го брани распишаниот тендер за централизирана набавка на реагенси за наредните три години тежок 35 милиони евра на кој му недостасува само името на економскиот оператор“, се наведува во партиското соопштение.
Како што велат од ВМРО-ДПМНЕ, Филипче бранејќи го распишаниот тендер кој ја возбудил и стручната, но и широката јавност, немал ниту збор за тендерската документација, која, според партијата, во делот на техничката спецификација е спротивна на Законот на јавните набавки, бидејќи со истата се фаворизираат апаратите на само еден економски оператор.
„Исто така во делот на тестовите е објавена како НЕДЕЛИВА ПОСТАПКА, иако од предметот на набавка станува збор за различни тестови со што всушност Министерството за Здравство нема да обезбеди услови за правична, недискриминаторска и конкурентска постапка и отвора сомневањето дека оваа постапка ќе заврши со еден понудувач кој однапред е познат“, велат од опозициската партија.
Оттаму додаваат дека министерот за здравство не делувал сигурно во врска со иднината на вработените во лабораториите во склопот на ЈЗУ во Република Македонија.
„Согласно концептот вработените во досегашните лаборатории ќе станат земачи на крв до 10:30 часот, а потоа што ќе работат истите? И дали ќе бидат приморани да си го сменат местото на работење во друг град каде што има централна лабораторија или избркани од работа, се стават во подредена положба на економскиот оператор кој што би го добил тендерот и истите би се претвориле во негова услужна дејност, бидејќи работа на самите вработени професори, доктори на науки, специјалисти лаборанти и други би била земање на крв“, сметаат од партијата.
Додаваат и дека меѓу најспорните барања во овој тендер се оние што се однесуваат договорниот орган за транспорт на крв до централните лаборатории.
„Овде со право се поставува прашањето како би се транспортирала крвта до централните лаборатории како и најголемиот проблем КОЈ ЌЕ врши контрола на тоа како се транспортира крвта ГО КОНТРОЛИРА ТРАНСПОРТОТ НА КРВ? Таквиот транспорт претставува сериозна работа имајќи го предвид крајниот резултат за пациентите, врз основа на што подоцна се одредува и дијагнозата и лекувањето. Целиот овој нов систем, од набавката, преку централизацијата од еден, можеби веќе определен оператор, до транспортот, веќе го понесе името – враќање на партизанско работење“, стои во соопштението.
Од опозициската партија констатираат дека цените на реагенсите постојано паѓаат, а, како што велат, ЌЕ министерот Филипче сега вели дека ќе се заштедело затоа што ќе се купеле одеднаш материјали за три години однапред.
„Ова постапка нема ниту за цел да направи заштеда, ниту има за цел подобрување на услугите за пациентите ниту пак подобрување или унапредување на работата на здравствените работници и соработници, туку ги има за цел личните интереси и интересите на одредена група на луѓе, од што на крајот само тие би имале бенефит“, велат од ВМРО-ДПМНЕ.
