Имајќи предвид дека нема рокови во однос на објавувањето на законот за јазици, сметам дека во соодветно време, кога ќе проценам дека треба да се прати законот до Службен весник, тој ќе се објави и потоа да можат другите надлежни институции да се произнесат по однос на текстот на законот односно за оние укажувања и дилеми кои се искажаа во јавноста, вели претседателот на Собранието на Република Македонија Талат Џафери во Неделното интервју на Радио Слободна Европа.
На прашањето кога би било тоа соодветно време, тој кратко одговара: „Па, во секој случај тоа е време кога ќе проценам јас за ситуацијата воопшто.“
Џафери не сака да ги коментира гласините дека ДУИ калкулира со Законот за јазици и игра топло-ладно за во случај на предвремени парламентарни избори, кои се во игра со претседателските, да го извади повторно и да го направи тема.
„Не би сакал да коментирам тоа што вие го нотирате. Сметам дека тоа не е став и калкулирање на ДУИ и на која било од политичките партии, затоа што законот е веќе донесен по втор пат и нема каква калкулација да се направи во однос на тоа“, вели Џафери во интервјуто за Радио Слободна Европа.
