Српскиот претседател Александар Вучиќ ќе биде првиот странски лидер што ќе го посети Владимир Путин по неговата инаугурација, по четврти пат, како претседател на Русија.
Двајцата претседатели ќе разговараат за можностите за развој на билатералната соработка и ќе ги разменат своите ставови за регионалните прашања.
„Рускиот претседател Владимир Путин ќе се сретне со српскиот претседател Александар Вучиќ, кој ќе биде во работна посета на Москва и ќе учествува во свеченостите по повод на 73-годишнината од победата во Големата патриотска војна. Планирано е да бидат разгледани тековната состојба и можностите за понатамошно развивање на руско-српската соработка, реализацијата на заедничките инвестициски проекти, а исто така да бидат разменети и мислења за актуелните регионални прашања”, соопштија од прес-службата на Кремљ.
Путин и Вучиќ често се среќаваат и разговараат по телефон. Во март Вучиќ му честиташе на својот руски колега за победата на претседателските избори. Во текот на друг телефонски разговор што се одржа неколку дена подоцна, тие разговараа за протерувањето на руските дипломати во повеќе европски земји. Тогаш српскиот претседател истакна дека неговата земја нема да се приклучи кон овие мерки.
