Зоран Заев ги погази Уставот и законите само за да ја одржи својата коалиција со ДУИ, обвинува Орце Ѓорѓиевски, член на ИК на ВМРО-ДПМНЕ.
Тој вели дека Заев излажал дека Законот за јазици нема да се применува во Штип, Прилеп и во Радовиш. „Во законот јасно стои дека сите судски постапки, управни, кривични, граѓански, како и постапки пред органите на државната управа ќе мора да се водат и на албански јазик доколку во нив се појави сограѓанин Албанец“, рече Ѓорѓиевски.
Тој вели дека Заев и на 10 март излажал дека двојазичните униформи и двојазичните пари биле неуставни. „Сега Зоран Заев реши и ваквото неуставно решение на сила да го истурка за да се додвори на ДУИ. Зоран Заев лажеше и на 17 мај кога ја потпиша изјавата кај претседателот Иванов и се обврза дека ќе го гарантира уставниот поредок и нема да се носат закони кои ќе бидат во спротивност со Уставот“, рече Ѓорѓиевски.
Тој повтори дека Законот за двојазичност е штетен, неприменлив и неуставен и е во спротивност со волјата на граѓаните, ставот на експертите, Уставот на државата и укажувањата од страна на претседателот на нашата држава. Според Ѓорѓиевски, одлуката на претседателот Иванов да не го потпишува Законот е единствено исправна одлука. „Секој незаконски обид за негово озаконување без потпис на претседателот на државата претставува кривично дело и сторителот на истото ќе сноси кривична одговорност“, истакна Ѓорѓиевски.
