Талибанската верска полиција запали голем број музички инструменти во западната провинција Херат, објави вчера авганистанската државна новинска агенција Бахтар.
Шеикот Азиз ал-Рахман ал-Мухаџир, провинциски шеф на Министерството за промоција на доблести и сузбивање на пороците, рече дека музиката довела до „погрешно насочување на младите и уништување на општеството“.
Талибанците ја забранија нерелигиозната музика последен пат кога владееја со земјата во 1990-тите. Објавените фотографии покажуваат дека службениците се собрале околу оган со музички инструменти, вклучувајќи гитари, хармоника и звучници. Авганистан има силна музичка традиција, под влијание на иранската и индиската класична музика, пишува ДВ.
Многу музичари ја напуштија земјата
Исто така, има просперитетна поп-музичка сцена која ги спојува електронските инструменти и денс-ритовите со потрадиционалните ритми. Растот на таа сцена се случи во изминатите 20 години пред талибанците да дојдат на власт во 2021 година.
Талибанците воведоа остри мерки откако ја презедоа контролата врз Авганистан во август 2021 година по повлекувањето на силите на САД и НАТО.
Учениците и наставниците во авганистанскиот Национален институт за музика, некогаш познат по својата инклузивност, не се вратија на часовите откако Талибанците ја презедоа власта. Многу музичари исто така побегнаа од земјата. Талибанците ветија поумерено владеење од она од нивниот претходен мандат на власт во 1990-тите.
Тие најавија затворање на козметичките салони
Тие ветија дека ќе ги овозможат правата на жените и на малцинствата. Наместо тоа, тие повторно воведоа остри мерки во согласност со нивното строго толкување на исламскиот закон или шеријатот. Спроведоа јавни егзекуции, го забранија образованието на девојчињата по шесто одделение и исто така им забранија на жените од повеќето форми на вработување.
Претходно оваа недела, талибанците најавија дека сите козметички салони треба да бидат затворени затоа што нудат услуги забранети со исламот и предизвикуваат економски тешкотии на семејствата на младоженците за време на свадбените веселби.
