Членството на Украина во Европската Унија може да ја принуди ЕУ да се откаже од идејата за членство на Турција во организацијата, пишува „Политико“.
Во текстот се нагласува дека поради ова, на некои членки на ЕУ ќе им биде полесно ако во вториот круг од претседателските избори во Турција победи Реџеп Таип Ердоган, а не неговиот ривал од опозицијата, Кемал Киличдароглу кој се залага за поблиска интеграција со ЕУ. .
„Во одреден момент ќе мораме да ставиме до знаење дека Украина и Западен Балкан се последните кои влегуваат во ЕУ. Незамисливо е ЕУ да може да ги прифати и Турција и Украина, бидејќи пазарот нема да го издржи тоа“, изјави неименуван висок европски функционер.
Според весникот, лидерите на земјите од ЕУ на самитот во декември најверојатно и официјално ќе ги започнат преговорите за членство со Украина.
На 28 февруари 2022 година, претседателот на Украина, Володимир Зеленски, ја поднесе апликацијата за членство на Украина во ЕУ. Киев доби кандидатски статус во јуни.
Европската комисија во февруари 2023 година изјави дека Украина како целина сè уште е на почетното ниво на подготовка за членство. Во април, пак, ЕК изјави дека нема скратен пат за влез на Украина во ЕУ.
Првиот круг од претседателските избори во Турција се одржа на 14 мај и во него Ердоган освои 49,51 отсто од гласовите, а неговиот противкандидат, лидерот на опозицијата Кемал Киличдароглу 44,88 отсто. Вториот круг е закажан за 28 мај.
