Полска денеска објави дека запленила руска училишна зграда во Варшава и дека зградата сега ќе биде во сопственост на градот, соопшти Министерството за надворешни работи.
„Од денеска зградата е во сопственост на градските власти“, рече портпаролот на министерството Лукаш Јасина, истакнувајќи дека станува збор за запленување. Русија веднаш го осуди овој „незаконски чин“ на полските власти и вети дека ќе одговори соодветно.
„Тоа е незаконски чин и напад на дипломатска локација и како таков претставува кршење на Виенската повелба за дипломатски односи“, изјави рускиот амбасадор во Варшава Сергеј Андреев, додавајќи дека Русија ќе одговори „според принципот на реципроцитет“.
Градските власти на Варшава пред една година ја конфискуваа руската дипломатска зграда која ја прогласија за „гнездо на шпионите“. Овој случај е предмет на правен спор меѓу Русија и Полска.
Станува збор за десеткатница од 1970-тите, која ја користеле советските дипломати, а подоцна станала руска амбасада.
