Најмалку 35 лица загинаа откако паднаа во бунар кога се урна подот на хинду храм во Индоре, централна Индија.
Се испостави дека подот што го покрива бунарот е всушност само плочки поставени над метална решетка.
Покрената е истрага за трагедијата и ќе бидат обештетени семејствата на загинатите, изјави Наротам Мишра, министер за внатрешни работи на Мадја Прадеш.
Голем број верници, главно жени и деца, беа присутни во храмот во четвртокот на хинду фестивалот Рам Навами, објави Гардијан.
Полицијата соопшти дека слабиот под попуштил под нивната тежина.
Телевизиските снимки покажуваат дека работниците за итна помош користат јажиња и скали за да стигнат до луѓето.
Други снимки покажуваат срушен под и оштетени челични шипки.
„Видов како некои луѓе паѓаат со сè уште склопени раце во молитва, изгледајќи збунето“, рече една жена која беше очевидец.
Официјални лица велат дека спасувачките операции продолжуваат.
„Имаме голем тим на спасувачи, дополнети со армиски персонал. Успеавме да спасиме 18 луѓе, кои сега се во болница“, рече комесарот на Индоре, Паван Шарма.
Слична трагедија се случи лани во ноември во Гуџарат, во западна Индија, кога загинаа 135 лица, главно жени и деца
