Портпаролот на Кремљ, Дмитриј Песков, денеска изјави дека планот за евентуално американско снабдување со тенкови „Абрамс“ за Украина е неуспешен од технолошки причини бидејќи овие тенкови се скапи, а како што рече, цената ќе ја платат европските даночни обврзници.
Можноста САД да ѝ испратат „Абрамс“ на Украина, Кремљ ја оцени како скапа глупост наведувајќи дека овие борбени тенкови ќе изгорат.
Евентуалните американски испораки на борбени тенкови за Украина ќе бидат уште една очигледна провокација против Русија, изјави денеска рускиот амбасадор во САД, Анатолиј Антонов.
„Очигледно е дека Вашингтон намерно се обидува да ни нанесе стратешки пораз“, напиша Антонов на „Телеграм“.
Претходно денеска, Германија официјално потврди дека ќе испрати тенкови „Леопард 2“ во Украина.
Американскиот претседател Џо Бајден денеска ќе објави дека Вашингтон ќе ѝ ги испорача борбените тенкови „Абрамс„ на Украина, пренесува „Ал џезира“ повикувајќи се на неименуван американски функционер.
