Шефот на украинската воена разузнавачка агенција изјави дека борбите во Украина моментално се во мирување бидејќи ниту Украина ниту Русија во моментов не можат да постигнат значителен напредок.
Ситуацијата едноставно е заглавена“, вели Кирило Буданов во интервју за Би-Би-Си.
Откако украинската армија го врати Херсон во ноември, повеќето од најжестоките борби се водеа околу Бахмут во областа Доњецк. На друго место, руските сили се чини дека се во дефанзива, а зимата ги забави украинските копнени операции.
Буданов рече дека Русија „сега е целосно во ќорсокак“ и трпи многу значителни загуби и смета дека Кремљ одлучил да објави нова мобилизација на регрути. Тој исто така наведува дека на украинските сили им недостасуваат ресурси за напредување.
„Со големо нетрпение очекуваме нови набавки на оружје и пристигнување на понапредно оружје“, рече Буданов.
Претходно овој месец, по серијата руски воени неуспеси, украинските власти предупредија на можноста за нова копнена офанзива на московските сили од Белорусија на почетокот на 2023 година. Сепак, Буданов ја отфрли таа можност.
„Засега не гледам знаци на подготовки за инвазија на Киев или северните области од Белорусија“, вели тој.
