Поранешниот американски претседател Доналд Трамп на свој карактеристичен начин најави дека можеби ќе се кандидира на претседателските избори што ќе се одржат во Соединетите Американски Држави во 2024 година, јавува Анадолија.
„Се натпреварував двапати. Двата пати победив. Вториот пат поминав многу подобро од првиот. Сега за да ја направиме нашата земја повторно успешна, безбедна и славна, веројатно ќе мора повторно да го направам тоа“, рече Трамп на митинг во Тексас.
Тој исто така кажа дека гласачите кои го избраа за претседател на САД во 2016 година сега се посилни од кога било.
„Тивкото мнозинство се врати посилно од кога било досега… Мои сограѓани, ова неверојатно патување на кое одиме заедно само што започна“, рече Трамп.
Неговите изјави следеа неколку часа откако актуелниот американски претседател на САД, Џо Бајден, изјави дека се уште не се огласил, но дека има намера повторно да се кандидира на претседателските избори во 2024 година.
