Рускиот претседател Владимир Путин тврди дека во светот постои реална опасност од глад, што е резултат на западните санкции кои го прекинаа транспортниот синџир, па сиромашните земји не можат да купат, меѓу другото, руска пченица и вештачки ѓубрива.
Говорејќи на Шестиот советодавен самит за соработка и мерки за градење доверба во Азија, што се одржа во Астана, главниот град на Казахстан, со овие зборови, Путин оптимистички оцени дека во тек се големи промени во светската политика и економија. Светот, вели, станува мултиполарен, а клучна улога почнува да игра Азија, чии земји стануваат локомотива на развојот на светската економија.
За да имаме стабилна ситуација во Азија, сите земји во тој дел од светот, според Путин, треба заедно да се борат против тероризмот и трговијата со дрога, да не пропагираат радикални идеи и повеќе да ги користат националните валути во меѓусебната трговија и со тоа да го зголемат националниот суверенитет.
Путин смета дека треба да му се помогне на Авганистан, бидејќи тоа е главната главоболка на регионот. Тој вели дека САД треба да надоместат за дваесетгодишната штета и да ги вратат замрзнатите девизни резерви на Авганистан.
На средбата, покрај домаќинот Казахстан, учествуваа и лидерите на Русија, Турција, Азербејџан, Ирак, Иран, Катар, Киргистан, Таџикистан, Узбекистан и Палестина. Во таа организација има 27 земји, а статус на набљудувач имаа САД и Украина. Но, поради актуелната ситуација, лидерите на многу земји не дојдоа во Астана.
Рускиот претседател посочи дека неговата земја е за широка заемно корисна соработка – трговија, инвестиции и проширување на соработката во различни области, пренесе Новости.рс.
