Генералниот директор на Светската здравствена организација (СЗО), Тедрос Аданом Гебрејсус, рече дека има пад на новозаразени од коронавирус во последните седум недели.
Ова е најдолг период на опаѓање на неделно ниво од почетокот на пандемијата.
Гебрејсус во Женева изјави дека нивната цел е да се вакцинира најмалку 70 проценти од светската популација до самитот Г7, што ќе се одржи во Германија во 2022 година.
„Потребни ни се 11 милијарди дози вакцини за да ја постигнеме оваа цел“, рече лидерот на СЗО.
Проценувајќи ја моментната состојба кога станува збор за пандемијата, Гебрејсус рече дека бројот на новозаболени е намален во последните седум недели.
„Иако бројот на новозаразени на неделно ниво е најмал од февруари, бројот на смртни случаи не опаѓа толку бргу. Бројот на смртни случаи пријавени минатата недела беше сличен на претходниот. Повеќе од 10.000 луѓе умираат секој ден, рече Гебрејсус.
Тој напомена дека падот на бројот на заразени лица е само маска наспроти алармантното зголемување на смртните случаи во многу земји. Според него, „ненадејното зголемување во Африка е особено загрижувачко затоа што ова е регион со мал пристап до вакцини“.
