Белгиските власти ја прекинаа вакцинацијата со „јансен“, вакцина на компанијата „Џонсон и Џонсон“ за лица под 41 година бидејќи една жена почина по примањето на вакцината.
„Меѓуминистерската конференција донесе одлука за привремено запирање на вакцинирањето со ‘јансен’ за граѓани на возраст под 41 година сè додека не дојде подетаљна анализа на придобивките и ризиците од ЕМА (Европската агенција за лекови)“, се вели во соопштението на јавните здравствени власти.
Жена помлада од 40 години почина на 21 мај. Таа претходно била хоспитализирана поради тежок случај на тромбоза и недостиг на тромбоцити, се вели во соопштението.
Таа била вакцинирана преку својот работодавец и надвор од официјалната белгиска кампања за вакцинирање.
Досега во Белгија пристигнаа 40.000 дози „јансен“, а 80 проценти од дозите се инјектирани на возраст над 45 години, се вели во соопштението.
Компанијата „Џонсон и Џонсон“ на 20 април објави дека ќе ја продолжи испораката на вакцината во Европската Унија, но со предупредување на етикетата, откако побара од некои земји, вклучително и Белгија, привремено да престанат со вакцинацијата поради ретки случаи на згрутчување на крвта по вакцинирањето.
Компанијата тврди дека не е воспоставена јасна причинско-последична врска помеѓу тромбите и вакцините, а ЕМА посочува дека придобивките ги надминуваат ризиците.
Вакцината „јансен“, која се дава во единечна доза, првенствено се користи во Белгија за вакцинирање стари лица во нивните домови и за ранливите групи, како што се бездомници и мигранти без документи.
Белгија побара совет од ЕМА за да се процени врската помеѓу смртта на жената и вакцината на „Џонсон и Џонсон, но не соопшти кога очекува конечно мислење од Европската агенција.
