Полицијата во Хонгконг се судри со демонстрантите на неколку локации во неделата, десеттата недела од протестот, објави Си-ен-ен.
Демонстрантите почнаа да се собираат во паркот Викторија, а од таму тргнаа во другите градски подрачја. Поточно, демонстрантите почнаа да применуваат нови тактики на проширување и дејствување во повеќе области, пренесува Би-би-си.
Во полициското соопштение се вели дека демонстрантите поставиле барикади на улицата Хенес, го блокирале сообраќајот и фрлале молотови коктели кон полицајците. Полицијата го осуди насилното однесување на демонстрантите.
Според полициското соопштение, полицијата ги советувала жителите од областа да останат во затворено и да не отвораат прозорци.
Протестите требаше да бидат мирни, но имаше судири со полицијата. Полицијата во неделата употреби солзавец во обидот да ги растера демонстрантите. Најмалку девет лица на возраст меѓу 17 и 59 години се повредени во судир меѓу полицијата и демонстрантите, соопшти Одделот за информации на Хонгконг.
Од девет, двајца се задржани во болница, а еден е во сериозна состојба.
Демонстрантите сега бараат поголема слобода, истрага за наводна полициска бруталност и друго. Според полицијата, досега се уапсени речиси 600 лица, а апсењата се поврзани со низа прекршоци, како што се учество во нереди, незаконско собирање, напад врз полицајци, се спротивставува на апсење и поседување оружје.
