Администрацијата на американскиот претседател Доналд Трамп издаде регулатива за замрзнување на целиот имот на владата на Венецуела во САД.
Извршната регулатива беше потпишана од Трамп и претставува многу повеќе од санкциите воведени во последните неколку месеци против венецуелската нафтена компанија ПДВСА и финансискиот сектор, но и од мерките против десетици венецуелски претставници, пренесува „Ројтерс“.
„Сиот имот и уделите во имотот на владата на Венецуела сместени во САД се блокирани и не можат да бидат пренесени, платени, пренесени, повлечени или на друг начин реализирани“, се вели во извршната регулатива што ја објави Белата куќа.
Забраната вклучува и забрана за американски компании и поединци да соработуваат со владата на претседателот на Венецуела Николас Мадуро и неговите приврзаници, пренесува АП.
Според агенцијата, најновата регулатива ја става владата на Мадуро на списокот на кој веќе се наоѓаат Куба, Северна Кореја, Сирија и Иран, на кои веќе им се воведени „агресивни санкции на САД“.