Руската амбасада во Техеран е во контакт со иранските власти поради рускиот екипаж на танкерот под знаме на Велика Британија што беше запленет на иранското крајбрежје, изјави рускиот заменик-министер за надворешни работи, Михаил Богданов, пренесува „Спутник“.
„Амбасадата е на задача, сите се на работа. Сите услуги, сите канали се активни, ние сме во близок контакт со Иранците”, изјави Богданов.
Иранската војска минатиот петок го зароби танкерот за нафта „Стена имперо” во Ормускиот Проток поради наводно непочитување на правилата за поморство. Неговиот екипаж од 23 лица, меѓу кои и тројца Руси, останува на бродот, кој е закотвен во иранското пристаниште Бандар Абас.
Шведскиот сопственик на танкерот, „Стена балк“, изјави дека изминатиот викенд поднеле формално барање до пристанишните власти, барајќи да се сретнат со морнарите и чекаат одговор. Иран вели дека морнарите се во добра здравствена состојба.
