Руската амбасада во Лондон ги демантира извештаите во британските медиуми во кои се тврди дека Русија ја поддржува воената операција на Либиската национална армија (ЛНА) под команда на маршалот Калифа Хафтар, пренесува ТАСС.
„Таквите изјави се далеку од вистината. Руската страна одржува контакти со сите политички сили во Либија и им ги испраќа сите исти сигнали, без да се обиде да заземе нечија страна. Сметаме дека сите вклучени либиски страни треба да се смират и јасно е дека военото сценарио може дополнително да ја комплицира веќе тешката ситуација во земјата и да доведе до нови жртви и штети“, рече портпаролот на амбасадата.
Тој посочи дека сегашната криза во Либија е директен резултат на незаконската воена интервенција на НАТО во земјата во 2011 година.
„Во потрага по начини за надминување на оваа криза Русија отсекогаш била и ќе остане посветена на политичко-дипломатско решение и инсистира на тоа дека самите Либијци треба да си ја одредат својата иднина.
Ги поддржуваме напорите на генералниот секретар на ОН, Антонио Гутереш, и на специјалниот претставник за Либија, Гасан Саламе, за нормализирање на ситуацијата. Се надеваме на брз почеток, на стабилен, инклузивен и интралибиски политички процес под покровителство на ОН“, нагласи портпаролот.
