Владата во текот на денот ќе поднесе дел од нацрт-амандманите на Уставот во Собранието, најави пратеникот Александар Кирацовски. Тој вели дека целиот процес за менување на Уставот ќе трае два и пол месеца имајќи превид дека три дена ќе се разгледува еден амандман, но и дискусијата на пленарната седница.
„Се надевам дека сите ќе учествуваат во дебатата за поднесените амандмани за заедно да го заокружиме процесот. Нема веќе за што да се преговара. 120-те пратеници ќе ги разгледаат нацрт-амандманите бидејќи тоа е нивна работа. Потоа, преку комисијата и пленарната седница ќе одиме на потврдување или подобрување на амандманите“, рече Кирацовски.
Пратеникот вели дека ќе се формира најавената комисија за национално помирување. Тој се надева дека ВМРО-ДПМНЕ ќе ги надмине внатрепартиските проблеми и ќе ги стави националните пред личните интереси.