Зоран Ангеловски ќе биде новиот директор на Оперативно техничката агенција (ОТА). Неговото име се очекува официјално да биде обелоденето попладнево на седница на Комисијата за избори и именувања. Дека политичките партии во Собранието постигнале консензус Ангеловски да биде избран меѓу 14 кандидати за оваа функција, потврди и премиерот Зоран Заев.
„Ѝ дадов само задача на пратеничката група бидејќи правеа консултации со мене да изнајдат професионално и експертско решение. Ме информираа дека е најдено решението. Ниту се интересирам, ниту ми треба да знам. Зошто? Затоа тоа е првиот исчекор дека сме научиле нешто од минатото“, рече Заев.
Оперативно-техничката агенција, која ќе биде медијатор во прислушувањето меѓу операторите и корисниците, се очекува да почне со работа од ноември 2018 година. Во ОТА треба да се пресели опремата за следење на комуникациите, со која досега располагаше Петтата управа во Управата за безбедност и контраразузнавање (УБК).
