Укинувањето на приватноста на сметките ќе ги направи граѓаните потенцијална цел на уцени, закани и други криминогени дејства на структури блиски до власта. Со ваквото законско решение СДСМ уште еднаш бескрупулозно го крши Уставот на Република Македонија, поточно членот 25, кој гласи: „На секој граѓанин му се гарантира почитување и заштита на приватноста на неговиот личен и семеен живот, на достоинството и угледот“, велат од ВМРО-ДПМНЕ.
„Воедно, една од клучните цели на оваа одлука на Владата е да се даночат оние што продаваат интелектуален труд во светот, односно ИТ-услуги, преводи и други трудови. Со ова дополнително ќе се даночи структурата на граѓани што прави извоз со минимално користење на домашните услуги за кои плаќа. Овие законски измени се единствено резултат на стравот и паранојата на Зоран Заев и СДСМ од сопствените граѓани. Страв кој е резултат на противењето на граѓаните на штетните антидржавни политики што ги спроведува СДСМ. Зоран Заев досега покажа дека единствено го интересира зачувувањето на својата фотелја бидејќи знае дека во моментот кога ќе падне од власт и ќе ја изгуби контролата врз правосудството, ќе мора да одговара за своите и криминалите на своите сопартијци. Денот кога во државата ќе се врати правдата и правната држава, Македонија ќе победи“, се вели во соопштението.
