Советот на општина Маврово–Ростуше донесе одлука со која на семејствата кои ќе имаат новороденче во текот на 2018 година, ќе им биде доделена еднократна парична помош во висина од 5 илјади денари.
На седницата на Советот беше објаснето дека доделувањето на еднократната помош за секое новородено дете во оваа година е во согласност со општинската програма за остварување на социјалната заштита во општината Маврово–Ростуше.
Градоначалникот на општината, Медат Куртовски изјави дека оваа еднократна парична помош се однесува само за новороденчиња на семејства кои живеат постојано на територијата на општината Маврово–Ростуше, а не за семејствата на печалбарите кои се во странство.
Во општината Маврово–Ростуше има масовна миграција на населението. Според податоците на руралните заедници и локалната власт во странство се над 65 отсто од населението и тоа претежно во Италија, Германија, Швајцарија и други земји на ЕУ.
