Премиерот Зоран Заев денеска претседаваше со конститутивната седница на „Комитетот за земјоделство и безбедност на храна“, кој, како што истакна премиерот е наречен Агро Совет заради тоа што ги опфаќа сите теми од земјоделството, и кој претставува уште едно владино тело кое е во функција на земјоделците и агробизнисмените.
Во изјавата за медиумите, за надлежностите на Агро Советот, како и за темите за кои се разговараше на првата седница на советот, како дел од прес-конференцијата по овој повод, Заев истакна:
„Последниве години и покрај одвојувањето на сериозни суми за земјоделците во вид на субвенции, останаа уште неколку земјоделско-сточарски гранки на кои треба дополнително да им се посветиме. Најголемо внимание треба да насочиме кон млекопроизводството и овчарството. Тоа денеска беше една од точките на дневен ред. Затоа денеска прва точка на седницата беше состојбата во овчарството и мерките што ќе ги преземеме за да го стабилизираме ова производство од кое егзистираат голем број на семејства во Македонија“.
На Комитетот беа присутни и претставници на сточарите кои одгледуваат овци, со кои се разговараше за моменталната состојба и за мерките кои што треба да ги преземе Владата.
„Тоа е начинот на кој сакаме да работиме и делуваме: заеднички со земјоделските производители и со агробизнисмените. Тие најдобро знаат што е она што треба една Влада да им овозможи за да имаат рентабилно производство, а тоа е добро за развој на аграрот и вкупното стопанство во државата“, рече Заев.