Вицепремиерот задолжен за европски прашања, Бујар Османи, изјави дека утре евроамбасадорот Семјуел Жбогар ќе ѝ ја достави Стратегијата на Европската комисија за проширување со земјите од Западен Балкан до 2025 година. Османи очекува јасен сигнал дека Македонија има перспектива по затворање на отворените прашања во смисла на односите со соседите.
„Имаме прелиминарни информации што ќе содржи Стратегијата, но дефинитивниот текст ќе го видиме утре. Очекуваме да биде јасно сигнализирано дека Македонија има перспектива по затворање на отворените политички прашања во смисла на односите со соседите. Меѓутоа, тоа што го реков е важно Македонија да добие можност да го достигне рокот заедно со Србија и Црна Гора доколку во меѓувреме успее да ги исполни критериумите“, рече Османи.
Тој денеска во просториите на Секретаријатот за европски прашања го одржа вториот координативен работен појадок со амбасадорите и нивните претставници од земјите од Западен Балкан.
„Стратегијата за проширување на ЕК претставува една од најважните инцијативи на Европската комисија за овој регион затоа што директно покажува дека Европската Унија го враќа фокусот на регионот, а процесот на проширување со земјите од Западниот Балкан – повторно високо на агендата на Европската Унија“, истакна Османи додавајќи дека со овој документ Комисијата го става процесот на проширување на цврсти шини, со прецизни рокови, нешто што претставува обврска и за самата Унија.
Вицепремиерот Османи изрази очекување дека покрај Црна Гора и Србија, за кои е најавено а и се очекува да бидат наведени во Стратегијата како земји кои во моментов го предводат евроинтегративниот процес во регионот, во Стратегија соодветно да бидат наведени и европските перспективи за Македонија и Албанија, кои би биле охрабрени, согласно со успешното адресирање на обврските, набргу да ги почнат преговорите за членство, и со тоа, да се приклучат на истиот колосек за влез во Унијата до 2025 година.
Османи додаде дека очекува соодветно место во Стратегијата и за Босна и Херцеговина и Косово, кои треба да добијат јасни пораки дека се добредојдени и дека нивното место е во Унијата, со што целиот регион ќе се стави на европски шини и ќе се затворат дилемите за европската ориентацијата на земјите од Западниот Балкан.
