Ивица Јакимовски, генерален директор на градежната компанија „Голден арт“, на годишното собрание на Градежната комора на Македонија при Сојузот на стопанските комори на Македонија (ССК), е избран за нејзин претседател.
Компаниите членови на Градежната комора на Македонија едногласно му го доделија мандатот за следните две години.
„Создавање подобра бизнис-клима за компаниите од градежниот сектор, соработка со институциите, особено во поглед на приспособување на законската регулатива, зајакнување на членството во Комората и предлагање конструктивни мерки, како и поддршка на енергетската ефикасност преку следење на светските трендови во градежништвото, се најзначајните активности на кои ќе работиме заедно со компаниите членови на Комората во насока на задржување на стабилноста и просперитетот на градежништвото во Република Македонија“, изјави Јакимовски.
Додаде дека одговорноста што му ја доверија компаниите претставува дополнителен поттик со засилено темпо да ја води Градежната комора, која е отворена да соработува со сите фактори во секторот, експерти, бизнисмени, институции, како и образовен кадар, со цел развој на оваа значајна стопанска гранка.
Јакимовски посочи дека приоритет на Градежната комора на Македонија е барањето за продолжување на повластената даночна стапка од 5 отсто за данокот на додадена вредност (ДДВ) за продажба на станбен простор, со оглед на фактот дека во услови на регистриран пад во градежништвото во последните неколку месеци ова е една од мерките за која треба идно решение.
„Во услови на зголемувањето на даночната стапка на ДДВ за становите, очекувано е да следува намалување на номиналната вредност на приходите во буџетот по основ на ДДВ поради очекувањата за намалување на прометот на станови трипати, намалување на вработеноста во градежниот сектор и последователно на сите комплементарни дејности, поточно на 26 поврзани гранки поради намаленото производство на станови“, изјави Јакимовски.
