Фондот за иновации и технолошки развој (ФИТР) започна со нова иницијатива „#Петок за млади @ФИТР“ со цел да се поттикнат креативните вештини и иновативноста кај младите.
Овој петок (12.10.2018) започнавме со презентација на победничките проекти на учениците од пет средни училишта кои ги креираа во рамките на првата работилница за социјално претприемништво #UPSHIFT, која изминатата недела се одржа во Маврово, со поддршка на ФИТР и УНИЦЕФ.
„Оваа иницијатива е дел од новата програма на ФИТР – #Млади, со која сакаме да ги вклучиме младите уште од најрана возраст да почнат да истражуваат и да развијат критичка мисла, да се научат да развиваат иновативни проекти преку дружење и интеракција“, рече Деспотовски.
Директорот на ФИТР најави дека редовно ќе се организираат вакви иновативни тематски работилници со ученици од основни и средни училишта, а Фондот ќе објави и нов #Предизвик за млади истражувачи.
„Идеjата е да ги мотивираме децата да учат преку истражување, преку прашување, преку пронаоѓање на некои свои вистини со кои ќе ги поттикнеме да размислуваат критички и макар и да е погрешно, да кажат „не“. Не да читаат се од книги туку и самите да се обидат да направат нешто без да се плашат, “ рече Деспотовски.
Проектите кои денеска ги презентираа тимовите средношколци се однесуваат на подигање на еколошката свест: „Дај пластичен кош, не биди повеќе за природата лош“ и „Бон тон правила за животна околина“,проектот „Дружење без граници“ за поддршка на деца со посебни потреби, проектот за здрава храна „Енергични бомбици“,како и проектот „Динамик дуо“ за обновливи енергии. Потоа следуваше и заедничка креативна работилница. Специјални гости беа ученици од ОУ “Димитар Миладинов“ од Скопје.
Куса презентација на проектите и нивните тимови:
• Тимот на СУГС Владо Тасевски од Скопје со проектот „Дај пластичен кош, не биди повеќе за природата лош“ – Продажба на стаклени шишиња или термоси со посебни стикери со еколошка порака со цел подигање на еколошката свест за последиците од прекумерниот отпад од пластични шишиња.
• Тимот на Средното економско општинско училиште „Гостивар“ од Гостивар со проектот „Бон тон правила за животна околина“ – Набавка на посебни канти за отпадоци со 4 отвори и изработка на мобилна апликација која ќе сигнализира дали ѓубрето се фрла на право место. Целта е подигање на еколошката свест.
• Тимот на ПСУ „САБА“ со проектот „Дружење без граници“ – Дневен центар за основци и средношколци со посебни потреби, со волонтерска помош тим психолози и дефектолози.
• Тимот на ДСУ „Орце Николов“ од Скопје со проектот „Динамик Дуо“ – Две станици за полнење мобилни телефон, напојување со струја на мобилните телефони преку употреба на статични точаци.
• Тимот на СОУ „Јане Сандански“ од Струмица со проектот „Енергични бомбици“ – Отворање на ресторан во своето училиште со мени со избор на здрава храна: смути, органски палачинки, свежи сокови и слично. Планот на тимот е вработување на двајца професионалци, како и волонтерски ангажман од страна на учениците.
Овие проекти беа наградени во рамките на програмата #UPSHIFT за социјално претприемништво која има за цел да им помогне на тимовите ученици во развивањето на иновативни идеи.
